Medio cento de entidades de sete países traballando de maneira coordinada para conseguir, a través das tecnoloxías máis intelixentes, mellorar a seguridade das persoas e protexer a súa saúde. Nisto consiste DistriMuSe, Distributed multi-sensor systems for human safety and health, un ‘megaproxecto’ europeo dotado cun orzamento de 34,7 millóns de euros, dos que preto de 500.000 lle corresponden á Universidade de Vigo e, máis concretamente, a atlanTTic, o seu Centro de investigación en Tecnoloxías de Telecomunicación, desde onde participan nesta iniciativa 14 investigadores e investigadoras, dirixidos por Felipe Gil e Pablo Fondo, do Grupo de Tecnoloxías da Información.
O proxecto, coordinado polo Centro de Investigación Técnica VTT de Finlandia, busca incrementar a seguridade humana mellorando a detección da presenza e o comportamento humanos mediante sistemas multisensor e de aprendizaxe automática. Partindo do feito de que as actividades cotiás de calquera persoa están asistidas por unha variedade de dispositivos tecnolóxicos intelixentes, desde teléfonos móbiles, ata sensores de saúde pasando por aspiradores autónomos, robots industriais e coches cada vez máis autónomos, os socios do consorcio DistriMuSe destacan que a importancia de que a interacción con estes dispositivos sexa cada cada vez máis fluída, un aspecto que ofrece un gran potencial, pero que tamén expón a desafíos tecnolóxicos e trae consigo certos riscos.